2Sa 12 | TVK | STEP | Vatei, Iahova misil provet Netan be visal suv toto Deved. E melele xa be visali, biteni mini bitene, “?Suv, okila ulepis rin ak venou? Moletin lu luteti e taon tei takes. Tei, holesok nan holu, e tei be hoeo tei tang.

2 Samuel 12

Hi Misel Xat Suv Toto Deved

2 Samuel 12:1-23

1 Vatei, Iahova misil provet Netan be visal suv toto Deved. E melele xa be visali, biteni mini bitene, “?Suv, okila ulepis rin ak venou? Moletin lu luteti e taon tei takes. Tei, holesok nan holu, e tei be hoeo tei tang. 2 Ngan xa holesok nan holu, buluk e sipsip san xil labe holu pupu. 3 E ngan xa be hoeo, sulut sipsip san tei takes xa texal xati. Xi di telaxat kuh sulut sipsip ak, di tematu e tim san tetel horamue nan xil. Xi di tesa rut anien an mini, temaen ni di temun e kap nan, e di temaen ni tepat e rong man. Xi di tesak kuh sulut sipsip ak texoni atuli nan xati tang.

4 “Vatei, moletin tei texo sotin di tekakao temei, e xi mei testal e tim sa ngan xa holesok nan holu. E moletin xa holesok nan holu, xi ien ti tavei vahas vongoro tova san tengan vasak mesen anien tova vahe an. Ma, ba sung nggur sulut sipsip sa ngan xa be hoeo. Di, ba din ni meses tengan moletin xa mei testal mini ia ni. ?Ma, ulepis rin ak itep?”

5 Melele xa Netan misepin bus, Deved en nggat pupu ni moletin xa holesok nan holu. Ma biteni mak bitene, “!Inou nabit xati nggeih pe met Iahova xa meul, momal tang tengan moletin ak imat ve naha xa tepol ni! 6 Vengan xa sexien xa xi tepol ni misa pupu e esaeen nan tovuol, xi isa rilomun ni sulut sipsip san ihe hat (4).”

7 Ma Netan biteni mi Deved bit, “!Xouk vari tang iaxa obe moletin ak! Ma ngan ak be naha xa Iahova, Hi na mol-Isrel xil, bit vahiteni minuk: 'Inou natepol ni xouk mei otehe suv toto na mol-Isrel xil, e inou natehur xolok ve naha xa Sol tehit ti vapol ni minuk. 8 E melele xa natehur rat Sol, holesok xil xa teti hen, inou natesa ni minuk. Atou nan xil mun, inou natesa ni minuk. Mol-Isrel xil del mol-Sudah xil, inou nateling xil vus lateti pe hem. E xosxa rin ak tapin ti mu, ma inou nikila nisa ni minuk ihe holu mu. 9 ?Ma, veneh ma otnalong xat ti rae navan xil? ?Veneh ma otepol ni rin xa misa pupu xiak pe metok? Xouk iaxa otetil vin Uraea ni tiei te vaeen na mol-Amon xil. !Di, onggur atou nan mei be nam! 10 Vengan xa otepol ni temak, ma rut vatimol nam xil xa listal limei limat vehakut itel tiei na moletin sav xil. Ngan ak istal mi vatimol nam vengan xa xouk otesin rae navan e otehur atou na Uraea mei be nam.'

11 “Mak, ma Iahova biteni mun minuk bit, 'Nabiteni reitin xa nipol ni ngan xil e tim sam tang limea lipol isa minuk. Xouk upusi ni metom melele xa inou nileh rerat atou nam xil ranuk e nisa ni mi tei xa ixo vatimol nam. Xi ipat itel xil e valkesao tang. 12 Reitin, naha xa xouk otepol ni, otepol xuxus ni. E naha xa inou nipol ni, mei istal ihe kesao pe met mol-Isrel xil vus.'”

13 Melele xa Deved milonge mak, biteni mi Netan bitene, “!Aue li! !Inou napol misa pupu li pe met Iahova!”

E provet Netan bit rilomun ni mini bit, “Iahova miserep meulien nam ra tesaen nam, ma xouk onamat ti. 14 E vengan xa xouk otekavitou ni e otepol tesa temak, tuvava nam ak imat.” 15 Di, provet Netan dilomun be tim.

E melele xa Netan ba, Iahova pol ni tuvava na Deved xa atou na Uraea ngguri mesei pupu. 16 Ma Deved ba, di misis ba ni Hi tengan tuvava nan mei vahos rilomun. Xi bal ni anien, e vongien xil vus di pat dat tan ba ut milan. 17 Eilep nan xil xa ladi sangas visali laba, di lasak tengan lital rati ra tan. E xi ien ti tavei, e misin ni tengan vanien vatel xil.

18 Wik tei mei mitavi, e tuvava ak mat. E melele xa mat, eilep xil na Deved ulixil mikan tengan laviteni mini. Xil lanemi labit, “Melele xa tuvava ak temeul tamu, Deved bit nalong ti sepin nar vari. ?Imak, ma rihit mesen maten na tuvava nan mini itep? Maxani, ipol ni neta tova xa isa iha ni xi mun tang.”

19 Melele xa Deved pus xil di lasep piao mi xil mun tang, xi mikila vari xa tuvava nan mat. Ma xi misis xil bitene, “?Midep? ?Tuvava mat?”

Ma xil labit rilomun ni mini labitene, “Io li, mat.”

20 Melele xa Deved milonge, mea ra tan, ba minggul, minggul maxoe ni xi, e mising xoles eising nan xil. Di, be Nim Tavolin na Iahova ba mot mini. E melele xa dilomun be tim san, misis anien. Ma lalehi bemei, e xi ngga ni.

21 Melele xa eilep nan xil lapus sexien xa pol ni, mei labiteni mini labitene, “?Di opol ni mak veneh? Melele xa tuvava nam temeul tamu, xouk di otemuis ven e di otehal ni anien. E melele xa mat, xouk otamea ongganien sung.”

22 Ma suv toto Deved bit rilomun ni mi xil bitene, “Reitin xa inou di natehal ni anien e di natemuis melele xa tuvava ak di temeul tamu. Inou di natenemi natehit xos Iahova en isae li e nou, ma namaen tuvava ak ti namat. 23 ?E taxeak xa xi mat tuei, veneh ma namal ni anien? ??Nikila nipol ni tuvava imeul rilomun?? !E-e, nasakras! Vatova, inou nihe rute xa xi da en, e xi misakras vatilomun vamei visal nou.”

Solomon Tepot

2 Samuel 12:24-25

24 Ma suv toto Deved ba misepin kuhi mi atou nan, Batsiba, tengan vapet rat nenemien nan mei vahos rilomun. Dutou ni, Deved ba pat mun dela, ma xi di ni tuvava tei mun. Xi milingi be malohos, ma Deved miling hisen be 'Solomon'. Iahova ien bei pupu ni horamue ak, 25 ma biteni mi provet Netan tengan ha iling his tei mun ihe 'Sedidaia' xa koute teni be 'Ngan xa Iahova ien bei'.